#即时娱乐新闻##香港收视报告# 「TVB(@TVB官方微博 )惨淡一周 《拳王》有力同《刑侦日记》争年度包尾?」
TVB公布上周(11月29-12月5日)三间电视台直播收视数据,先睇大台表现……咦!唔多靓喎。
2套正在播映嘅台庆剧《十月初五的月光》以及《拳王》论收视完全冇台庆剧势头。《十》第2周有19.3点,同前周差唔多,台庆剧都冇20点真係要打手板。《拳王》直情更差,跌至16.1点,如果之后十五集未有起色,好有机会同《智能爱人》争年度尾二(全剧平均17.4点)……但係同全剧平均13.7点嘅《刑侦日记》比,都仲有好多优势!
另外2套一至五十点半综艺节目《麻雀斗室三决一》及《读心专家》都唔够12点,比前周跌2点,绝对响起警号。就连星期日稍有起色嘅《思家大战》都由前一集19.4点打回原形去返16.8点。唯一可喜係以《声梦》学员担正嘅《青春本我》,星期日首播录得16.8点,尚算收货。且看被盛讚係港版High School Musical嘅口碑帮唔帮到手。

TVB跌收视,Viu反而守得住。《全民造星4》被观众闹爆foul错人,演出亦唔够上季好睇,但收视依然keep到,上周甚至微升至5.7点。假如Viu惯性收视係3点,咁《造星》应该係5点起錶。另外2套综艺Have a Sweet Gym 及《歌手.门》收视都近乎不变。
11月22-28日︳台庆剧继续强差人意 《拳王》开局排全年尾二 《十月初五的月光》都係唔够20点
上周三台收视焦点落喺TVB2套压轴台庆剧《拳王》以及《十月初五的月光》嘅开播收视之上。睇新剧成绩前,先睇《星空下的仁医》大结局表现︰《星》上周一播出最后一集,终于冲破20点收视,收22点。以台庆剧+双视帝+钟嘉欣回归之作嘅牌头,竟然比唔上小品剧《宝宝大过天》、网上一早播完嘅《爱美丽狂想曲》,的确失礼。

咁新剧又如何?翻拍经典嘅《十月初五的月光》首周有19.4点,表现不过不失,但已经係四套台庆剧之中开局表现最好。以新演员担正,加上缺乏澳门取景呢个元素,即使唔过20点都算係咁,但要维持落去有难度。
至于有爆肌@张振朗Owen@黎耀祥Wayne 嘅《拳王》就相对失色,头4集只有16.5点。今年中TVB公布直播收视以来,呢个首周收视排全年尾二,只係比奥运期间出街嘅《智能爱人》(12.3点)好,顶多都係赢埋只有7集嘅《欺诈剧团》。上一套《拳王》收视出众,且看新一套后劲如何喇。
Viu今期梗係睇《全民造星4》收视啦,上周依然有5.5点,同前几周差唔多,未有受首圈foul走大热选手嘅负评影响,相信《造星4》已经建立到5点左右嘅稳定收视。上周有MIRROR成员Anson Kong节目 Have a Sweet Gym 接档Anson Lo《神的女主角》,首周有3.4点,比《神》结局周跌0.5点。而11点嘅时段新节目《歌手.门》只有2.3点,莫非电视台音乐节目真係冇咩观众捧场?
11月15-21日︳TVB台庆24.7点交到货 @李思捷JohnsonLee 竟然係今期收视保证

上周收视焦点又落返TVB身上,台庆嘛!
#万千星辉贺台庆# 》录得平均24.7点收视,算係近年新高,节目本身冇咩特别绰头都有呢个数,#曾志伟# ( @曾志伟奖门人 ) 总经理可以过关了。据知当晚最高收视时段係李思捷主持嗰part,而李主持嘅星期日游戏节目《思家大战》,最新一集直播收视有19.4点!当日搵#李思捷# 做主持,普遍都係负评,但係《思》出街之后,收视一路keep到15、16点左右,最近更出现升势,李一改以往主持风格,似乎观众几受。

2套台庆剧又表现如何?《换命真相》终于冲过20点,一至五有20.7点,星期日播大结局更有22.2点,不过全剧平均收视依然唔过20点,完全冇过去「台庆剧=收视好」嘅气势。另一套剧《星空下的仁医》就更惨,上周收视上升但刚好得19.9点,依然唔过20!拉匀平均收视计,《星》好大机会唔过20点,应该只能喺全年剧集收视排名较后位置出现。

讲完大台就轮到Viu。《全民造星4》微跌但依然有5.3点,今周开始淘汰赛理应更刺激,但係复活人选争议太大,可能有观众选择放弃,下个礼拜收视报告可以睇到係咪咁大影响。而以Anson Lo#卢瀚霆# 做招徕嘅《神的女主角》最后一周稍跌至3.9点,今周接力会有另一镜仔Anson Kong江烨生主持嘅Have a sweet Gym,收视成绩算係MIRROR两位Anson嘅人气小比併。
11月8-14日︳TVB 2套台庆剧仲未破20点 《全民造星4》不跌反升

上周(11月8-14日)收视报告又嚟啦!先睇TVB,2套台庆剧《星空下的仁医》同《换命真相》接近结局周,依然未能突破20点收视,《换》比上周升近1点,但仍然只有19.9点;《星》就更惨,未能食住前周升势,上周反而回落到19.3点。到底2套之中,边套最终可以破2?而下一档嘅《十月初五的月光》同《拳王》,会唔会更惨淡?

Viu方面,向来《全民造星》嘅第一回合比赛都係考验各方嘅环节︰近百个参赛者逐个出场,形式又类似,好考观众耐性︰录影由下昼3点去到第二日朝早9点,幕后、评判、参加者同导师齐齐冇得瞓。《全民造星4》第一周有5.3点,本来预计上周会跌,但係居然反地心吸力微升0.2点至5.5点。随住更多话题选手出现,第3周收视估计有望保持。
上次收视报告讲起,另外2套综艺《神的女主角》同《香港秘密搜查官》收视有惊喜,结果上周出现微跌,各自流失近半个收视点。《神》有4.3点而《香》就有2.9点,后者算係仅仅合格。
下次收视报告,焦点梗係睇《星空下的仁医》同《换命真相》结局周成绩如何,同埋《全民造星4》最后一周个人对决,会唔会赶客呢?
11月1-7日︳《全民造星4》收视好 《星空下的仁医》靠口碑反超前 两台大战冇输家?
上周三台直播收视报告出炉!今次重点梗係睇ViuTV以《全民造星4》、《神的女主角》及《香港秘密搜查官》三套综艺节目,为TVB台庆月「赠兴」嘅成效啦。
结果都几出人意表,《全民造星4》首周收视5.3点,以Viu平均嘅3点惯性收视计,算係相当突出,对比前一周嘅《赌命夫妻》更加係升咗6成半。《造星4》收视好都几合符赛果,亦因此带动以Anson Lo(卢瀚霆)做主导嘅《神的女主角》有4.7点,一洗前一档《台湾乜都拜》嘅颓势。而以《ERROR自肥企划》班底「无制限OT编集团」创作嘅《香港秘密搜查官》都有3.5点收视,令上周Viu一至五黄金时段整体成绩唔错。

奇就奇在TVB并无因此出现收视下跌,对正《造星4》嘅《星空下的仁医》上周升至19.4点,超越另一套卡士无咁强劲嘅台庆剧《换命真相》(19点),可以话係受传媒口碑推介所带动,估计加埋7天跨平台收视,升幅会更明显。而首周播出嘅10点半节目《男神厨房》有14.7点,比之前同时段2套旅游节目更好,证明「限厨令」嘅无谓。而《医医,我不想再病了》同之后嘅带货节目都冇受影响,即係话多咗人睇电视,和气收场。
不过《全民造星》系列向来都有个致命伤︰第一回合比赛有九十几个参加者,虽然今年节目尝试加快节奏,以1对1比赛增加可观性,但係呢个阶段快极都要播2-3个礼拜,未来2周收视能唔能够keep住个势?
10月25-31日︳TVB台庆剧微升 《东张》播曱甴老鼠横行收视反升

上周(10月25-31日)嘅三台收视报告,真係平淡到难以落笔。
TVB踏入台庆月,今个星期Viu正式出招「赠庆」,晚上9点半起先有王牌《全民造星IV》,10点半有教主Anson Lo(卢瀚霆)有份嘅真人show《神的女主角》,连11点都出动《ERROR自肥企划》嘅「格仔Mike」作品《香港秘密搜查官》。咁意味住上星期嘅全线综艺都步入结尾,但唔代表收视有升势。《台湾乜都拜》同《虫前有10个女仔》本身口碑麻麻,网上亦唔见好多人讨论,上周收2.7同2.5点,都可谓跌穿Viu3点嘅惯性收视。稍为有noise嘅《赌命夫妻》保持水平收3.2点,而全周其他节目收视都欠缺亮点。

TVB方面,2套台庆剧首周收视失利。虽然传媒都普遍大讚《换命真相》同《星空下的仁医》有水準,但质素高唔代表观众buy,广告商係睇「数」而唔係睇「素」。直播收视方面两剧依然未过20点,《换》有19.2点微升0.1点,《星》有18.9点升幅较大,到底口碑能否带动收视,就要睇官方公布嘅「跨平台收视」数字。

上周《东张西望》连播多宗食物及卫生相关报导,曱甴老鼠横行镜头贯穿观众开饭时间,但係《东张》收视不跌反升,有20.7点。虽然升幅唔够一点,但可能为制作组搵到出路︰观众唔怕重口味,仲好好送饭!
10月18-24日︳台庆剧失利《星空下的仁医》《换命真相》首周唔过20点
上星期(10月18-24日)三间电视台收视报告公布,重点一定係TVB 2套台庆剧《星空下的仁医》同《换命真相》首周成绩如何,结果……唔OK喎!
@马国明-Kenneth@郑嘉颖KC@Linda钟嘉欣 等主演嘅《星空下的仁医》,本来被寄予厚望,点知头5集直播收视只有18.5点,比起今年较早前播出、收视平平嘅《一笑渡凡间》(19.2点)更不济。

同样係台庆剧,被睇低半线嘅《换命真相》首周有19.1点,稍胜主角阵容更强嘅《星空下的仁医》。2套台庆剧嘅直播收视数字可以话係唔收货,除非剧集有口碑带动观众翻煲,否则难以有大幅增长。举个例,前一档嘅《我家无难事》首周收约19点,结局周有8号风球「加持」升至22点,由此可见要2套剧收复失地大幅反弹有几难,或者靠「七天跨平台收视」数字美化一下都得嘅。

TVB其他节目亦未见有突出表现,新节目《冰岛潮什么》(一至三10点半)守住13点左右;前2周都有颱风带挈收视嘅《#东张西望# 》同《#爱.回家之开心速递# 》,上周打回原形,跌至之前的20/21点水平。
Viu嘅收视都唔见得几好,前周异军突起嘅《台湾乜都拜》收2.8点,跌幅有2成半;接力《宵夜烧到过埋夜》嘅《虫前有10个女仔》更加食唔住前者个势,得2.5点,比《宵》最后一周流失4成观众,似乎要靠11月开播嘅《全民造星4》先有望翻身。而Viu全周收视之冠就係重播掀起换飞潮嘅《拉阔音乐会 风火雷电》,有4.1点。
10月11-17日︳打风再带挈TVB收视 《我家无难事》结局弹升
上次嘅收视报告提到,前周嘅星期六晚挂8号风球,令TVB当晚收视有所进帐。上星期二又係挂8号波,收视又有冇正面影响?
TVB公布嘅直播收视报告提到,上星期二嘅《东张西望》同《爱.回家之开心速递》都因为打风而取得高收视,《东》收27.8点而《爱》就有26.6点,亦都带动周一至五平均收视升1-2点。

另一焦点係黄金时段剧集《我家无难事》同《把关者们》结局周成绩。2套剧开播后收视疲弱,但係后半段开始稳步上扬,最终《我》最后5集收22点,以全年剧集成绩计算不过不失;而《把》一至五收19.5点,星期六大结局收18.5,始终无力突破20点…….
(yahoo娱乐圈) http://t.cn/R2WxksT http://t.cn/R2WxksT

更多香港媒体动态

全站最新消息

🤳 ​

魏大勋
2022/01/22 19:00
d