#苹果#:【表面风光...!】20万酬劳成泡影..., Chili穷到㶶!:两个月揾一万蚊都冇..!

拍AV系一个大话,#麦紫莉#Chili咁搏都系为咗上位同揾多啲钱。但世事边有咁如鱼得水,Chili由宣布拍AV至今,约两个月时间,做过四次酒吧骚及活动,但赚到嘅比预期少好多。

Chili认真地谂咗一谂:“之前所谓嘅五位数job,其实都系得四位数头,访问同大家咁讲,都系公司叫我咁讲,因为唔想俾人压价,实情最多得三千,至少一千,四次活动加埋一万蚊都冇。”犹记得Chili嘅公司声称Chili会接拍两部AV,每部收20万酬劳,出席书展活动时公关更请咗12位保镖,确实系威系势。Chili坦言𠮶刻都好愕然﹕“冇谂过公司会咁做,以我角度,点解请十几个保镖,都唔愿意花钱俾我买衫同化妆呢?!”

Chili透露与公司原本仲有两年合约,但因为经常被拖粮,及觉得有欠尊重,双方闹咗一场大交后,Chili就收到一个终止合作嘅短信,佢话﹕“我都好感谢佢哋无条件同我解约,俾机会我回复自由身。(有冇见过幕后老板?)连我都唔知系边个,我以前间公司突然话帮我签咗畀另一间公司,但张约又唔系我签嘅。”Chili表示签一间不知名嘅公司都系无可奈何,佢都好坦白咁话:“我谂我都冇资格入大公司。”

大话冚大话,Chili最真嘅,应该都系屋企人;爸爸七年前过身,并有一位患有肾病需要长期接受治疗嘅妈妈,一家四口曾经攞过综援。Chili表示屋企人最初听到佢拍AV,即时闹到翻天覆地,佢话﹕“闹呀,但我同佢哋讲系一条桥,唔系真系拍。(自己接唔接受到?)我都过唔到自己𠮶关,太激,我唔钟意喺人面前俾晒所有嘢人睇。(三级片?)我唔会谂呢啲,我最希望做打女,之前减咗14磅,想减多15磅,会继续努力。”